《ꆫꃀꀉꁌ》
ꁱꀘ：ꐚꃮꒌꁬ
ꀘꊿ：ꂟꌋꀈꇤ
ꉓꅐꉙꐛꉒꒉꆺꀕꂃꌠꑌꊭꋺ
ꑌꍞꑿꍜꍑꒉꆈꇗꀕꌠꑌꎵꋺ
ꑌꇂꑾꒌꇁꉚꉌꃀꁨꇊꉢꇬꎷ
——ꇬꅇ
ꃮꆪꑬꊸꅩꌬꌫꄮꇬ
ꑌꑿꊂꈹꑳꉎꎆꈜꍬꄉꉓꅐꁧꌠꑌꆏ
ꇵꂷꅧꇗꀕꌠꈍꑋꎆꈜꌦꅪꐛꀋꐚ
ꑳꉎꎆꈜꋋꏢꅽꇵꂷꇱꒈꊭꑙꈭꐨ
ꄙꇁꃪꈎꑌꑿꈳꅉꈴꆫꌺꍬꅉꍬꇬꎷ
ꅇꐚꈍꑋꅽꇬꇉꀀꄉꄄꍻꀕ
ꈍꑋꃢꃅꉉꌊꆫꌺꑌꑿꇰꑟꉂ
ꉙꅇꂘꅇꉬꇮꆏꄜꆫꌺꑌꑿꇰꊂ
ꑌꑿꄡꇗꎆꈜꍬꄉꉗꅐꉙꐛꈤ
ꆫꌺꄡꇗꉌꃀꊫꂫꏂꂿꄷꈜꎴꃅꄷꏹ
ꆏꀉꄂꀕꃅꁦꀑꑌꑿꉂꐪꄛꅉꄜꅷꇁꇬꎷ
ꆫꁍꈬꇬꆏꑳꅝꉒꐎꄓꊂ
ꑌꑿꉬꇮꅽꐰꇑꐊꄉꐚꅜꏿ
ꅽꎭꐪꉬꇮꐈꇁꆫꌺꊋꃤꐛ
ꆫꌺꐥꐨꈝꃀꉪꐨꐊꄉꐥꌒꑟ
ꅽꐥꍂꉬꇮꃅꈋꐰꇑꐛꆘꅝ
ꏂꆨꐻꎵꊪꏮꏭꄮꇬ
ꁬꃨꋋꀮꉠꉌꃀꈐꇬꄉꃨꁯꁉꈭꐨ
ꐛꑿꈍꑋꐙꃰꐚꆗꁧꇂꇉꄩꐺꀋꐚ
ꊫꂫꋋꏢꉠꉌꃀꈐꇬꄉꉪꐨꏂꈭꐨ
ꃅꈋꁡꇤꀉꄂꉒꈌꇂꃴꉂꏣꄛꄜꀕꀋꄿ
ꅽꐰꇑꀉꄂꏣꀋꑌꃅꀕꈋꑌꑿꐏꁇꇈ
ꉂꅇꉬꇮꄜꌊꑌꑿꂾꃚꐊꅊꉁ
ꎺꏣꉬꇮꎹꌊꉌꃀꊫꂫꏂꅊꉁ
ꆫꃀꀉꁌꁮꅉꉬꇮꌧꌊꆫꌺꇰ
ꁦꀑꑌꑿꃆꂮꉬꇮꄜꌊꊂꋊꇰ
ꃅꈋꁡꇤꁳꉂꅇꎺꏣꉉꌐꈤꀋꉆꃲ
